Sementando ferro

Un dos buques oceanográficos máis avanzados do mundo, o alemán Polarstern, acaba de chegar a unha zona do suroeste do océano Atlántico para iniciar o maior experimento realizado até a data de fertilización das augas con ferro como posible medio de loita contra o cambio climático. Trátase de comprobar con garantía científica como afecta o crecemento do fitoplancto (diminutas algas unicelulares) e ás súas consecuencias a vertedura de seis toneladas de sulfato de ferro en po (como o que se vende como abono para plantas) nunha área de 300 quilómetros cadrados. O fitoplancto non só representa a base da alimentación da vida mariña, senón que tamén desempeña un papel crave na fixación ou absorción do dióxido de carbono (gas de efecto invernadoiro) presente na atmosfera. Se o ferro induce a proliferación das algas e estas absorben máis dióxido de carbono, a fertilización da auga sería unha forma de loita contra o quecemento global.

En augas máis ao sur que as actuais se realizaron xa cinco experimentos de fertilización con ferro nos últimos oito anos, que abarcaron zonas moito máis pequenas. Neles induciuse un aumento do plancto similar ao que produce o ferro contido no po atmosférico continental ao caer no mar ou un iceberg que se derrete (no que previamente se estivo depositando po). Os resultados fan crer aos científicos que o actual non producirá un impacto ambiental perigoso.

En parte, o experimento pretende pescudar se o gran declive observado no krill desde que as baleas azuis foron decimadas hai unhas décadas nesta zona está relacionado con esta redución ou se debe só ao quecemento global. Crese que as baleas exercian un papel de abono, mantendo unha continuidade de ferro para o plancto nas augas superficiais. A expedición pódese seguir desde hoxe na dirección de Internet www.lohafex.com, do Instituto Alfred Wegener de Alemaña, que a coordina xunto ao Instituto Nacional de Oceanografía da India.

Fonte: El Pais