Carbón = cambio climático

A torre de refrixeración da central térmica de carbón das Pontes, na Coruña, luciu en plena noite unha estampa algo diferente á habitual. Durante unhas horas as persoas que pasasen xunto a esta cheminea xigante en pleno funcionamento puideron ler mensaxes como: "Carbón = cambio climático".

Activistas de Greenpeace escolleron a central galega por ser "a maior fábrica de cambio climático de España e unha das maiores de Europa" e proxectaron sobre o cemento da torre unha serie de imaxes que denuncian os efectos futuros do cambio climático.

Esta instalación térmica consume preto de nove millóns de toneladas de carbón, o que supón máis do 20% de todo o carbón consumido en España, e recibiu gratuitamente o 80% dos dereitos de emisión no período 2005-2007, segundo denuncia a organización ecoloxista.

España é o cuarto consumidor de carbón da Unión Europea, e o 64% do CO2 que emite o sector eléctrico provén das centrais térmicas de carbón, que só proporcionan o 23% da electricidade.

Esta acción enmárcase dentro da campaña de Greenpeace: "Salvemos o clima: abandonemos o carbón". A denuncia é unha chamada de atención dirixida, entre outros, aos parlamentarios europeos, que se van a reunir o próximo día 7 de outubro, para tomar decisións sobre como combater o cambio climático.

Fonte: EFE